Abdurahmon AKBAR

Bolalikda hamma shod,

Bolalikda hamma sho‘x.

Bolalikda hamma sog‘,

Bolalikda kasal yo‘q.

O‘g‘ilmidir, qizmidir,

Bolalikda hamma bir.

Dunyo degani – ko‘cha,

Tog‘larga o‘xshar adir.

Onang – oy, otang – quyosh,

Akang, opang – qarindosh.

Bolalikda ko‘zlardan

To‘kilgan yosh – ermak yosh.

Bolalik – sohira qush,

Yaratganning san’ati.

Go‘zal shodlik, go‘zal tush –

Bu dunyoning jannati.